Science Alert skýrir frá þessu og segir að vísindamenn við Universiteit van Amsterdam í Hollandi hafi rannsakað þetta. Þeir segja að það séu mörg atriði sem þarf að hafa í huga þegar metið er hvort eitthvað er satt eða logið. Þetta geti gert fólki erfitt fyrir að átta sig á hvort um lygi er að ræða.
„Fólk getur ekki lagt mat á fjölda merkja á skömmum tíma og tekið þau með í reikninginn,“ sagði Bruno Verschuere, réttarmeinafræðilegur sálfræðingur við Universiteit van Amsterdam, í samtali við Science Alert.
Hann og teymi hans gerði rannsóknina sem gekk út á að finna út hvernig sé best að finna út hvort verið sé að ljúga. Teymið þróaði aðferð sem virðist virka í flestum tilfellum.
Níu tilraunir voru gerðar þar sem 1.445 manns voru beðnir um að giska á hvort það sem fólkið sá eða las var satt eða logið.
Sumum var áður sagt að einblína á eitt atriði, það er hversu nákvæmar sögurnar voru, og hunsa allt annað.
Hinir fengu engar leiðbeiningar og notuðu eðlisávísun sína.
Verschuere sagði að niðurstaðan sé að það virðist vera gagnlegra að einblína á eitt atriði frekar en mörg.
Þeir þátttakendur sem notuðu eðlisávísun sína eða marga ólíka þætti til að finna hvort um lygi væri að ræða stóðu sig ekki betur en þeir sem giskuðu handahófskennt. Þeim sem hafði verið leiðbeint um að einblína á nákvæmnina í sögunum og hvort mörg smáatriði væru í þeim gekk betur að greina mun á lygi og sannleika og gerðu það með 59 til 79% áreiðanleika.
Niðurstaðan er sem sagt að þeim mun færri smáatriði, sem eru í sögunni, þeim mun meiri líkur eru á að þú sért að hlusta á lygara.
