Líklega hafði Giulio Giaccio enga hugmynd um þau hryllilegu örlög sem biðu hans þegar hann fylgdi tveimur lögreglumönnum til yfirheyrslu í júlí 2000.
Giaccio, sem var 26 ára, var með nokkrum vinum sínum í úthverfi Napólí þegar lögreglumennirnir gengu að honum og spurðu hvort hann væri Salvatore. Því neitaði hann að vonum en þeir kröfðust þess samt að hann kæmi með þeim á lögreglustöðina. Hann féllst á það og hvarf sporlaust í kjölfarið.
Sannleikurinn kom ekki fram fyrir en löngu síðar.
Lögreglumennirnir voru í raun mafíósar og þegar Giaccio settist inn í bílinn þeirra skutu þeir hann í höfuðið með skammbyssu. Því næst leystu þeir líkið upp í sýru, nema tennurnar. Þeir neyddust til að mölva þær með hamri.
Nú sitja mafíósarnir tveir á sakamannabekknum, ákærðir fyrir morðið.
Daginn áður en réttarhöldin hófust tók málið undarlega stefnu þegar mennirnir buðu fjölskyldu Giaccios sem svarar til 1,5 milljónar íslenskra króna í reiðufé í bætur auk fasteigna í Napólí að andvirði sem nemur um 18 milljónum íslenskra króna.
Þeir segjast hafa ruglast á Giaccio og öðrum manni og því hafi hann verið skotinn og settur í sýru.
Þetta segja þeir Salvatore Cammarota og Carlo Nappi að minnsta kosti. Þeir afplána nú þegar dóma fyrir önnur afbrot. Það var liðhlaupi úr mafíunni sem kom upp um þá og skýrði lögreglunni frá morðinu á Giaccio.
Þeir félagar tilheyra Polverino-mafíunni sem er hluti af hinni valdamiklu og ógnvekjandi Camorra-mafíu sem á rætur að rekja til Napólí. Camorra-mafían hefur mikil völd og áhrif í undirheimum Napólí sem og samfélaginu í borginni. En hún lætur ekki þar við sitja og teygja völd hennar sig vítt og breitt á Ítalíu og utan Ítalíu og er mafían einn af stóru aðilunum í fíkniefnaviðskiptum á heimsvísu og skipulagðri glæpastarfsemi.
Bandaríska alríkislögreglan FBI telur að um 7.000 manns tilheyri Camorra-mafíunni í um 100 mismunandi mafíuhópum. Þessir hópar starfa sjálfstætt og berjast oft innbyrðis.
Giaccio var eitt margra fórnarlamba Polverino-mafíunnar árið 2000. Flest fórnarlömbin áttu það sameiginlegt að hafa farið á fjörurnar við eða átt í sambandi við systur Salvatore Cammarota.
Út frá siðferðissjónarmiðum Camorra-mafíunnar þótti hún lauslát og þar með smánarblettur á orðspori Salvatore Cammarota. Hann var háttsettur innan mafíunnar og taldi sig því tilneyddan til að grípa til aðgerða.
Með liðsinni Carlo Nappi, og þriðja mafíósans, sem hefur ekki enn verið dreginn fyrir rétt, skipulagði hann blóði drifna herferð gegn vonbiðlum systur sinnar. Það var í þessari herferð sem Giaccio var ruglað saman við „Salvatore“ og endaði þar með í sýrubaði.
Fjölskylda Giaccio hafnaði boðinu um að fá greiddar bætur en á Ítalíu er oft litið á bótagreiðslur sem mildandi þátt þegar kemur að því að ákveða refsingu sakamanna.
