Maðurinn er sagður hafa þóst vera ung stúlka á netinu árum saman og hafi fengið unga pilta til kynferðislegra athafna með sjálfum sér og með öðrum börnum fyrir framan myndavélina.
Hann er einnig ákærður fyrir að hafa notað falda myndavél til að taka myndir af börnum og fullorðnum í sundlaug í Bergen. Þetta stóð yfir í 12 ár.
Maðurinn er sagður hafa birt myndefnið á djúpnetinu.
Norska ríkisútvarpið segir að maðurinn eigi allt að 21 árs fangelsi yfir höfði sér ef hann verður fundinn sekur.
Þegar lögreglan gerði húsleit heima hjá manninum fann hún barnaníðsefni þar sem börn allt niður í tveggja ára aldur voru beitt kynferðislegu ofbeldi.
Maðurinn hefur áður hlotið dóm fyrir vörslu barnakláms en það var 2006. Þá var hann dæmdur í 45 daga skilorðsbundið fangelsi sem þótti mildur dómur en hann var rökstuddur með að maðurinn hefði átt erfiða æsku.
Maðurinn hefur játað að hafa tekið myndir af börnum.
Ákæran er svo umfangsmikil að það tók saksóknara eina klukkustund að lesa hana upp.
Mörg fórnarlamba hans voru yngri en 14 ára þegar brotin áttu sér stað.
Hann er ákærður fyrir brot gegn rúmlega 40 börnum en lögreglan óttast að fórnarlömb hans geti verið allt að 1.000. Hún fann níðingsefni þar sem börn af 18 þjóðernum koma við sögu.
Ástæðan fyrir þessu mati lögreglunnar er að henni hefur ekki tekist að opna dulkóðaðar skrár þrátt fyrir að hafa reynt að opna þær með 500 milljón ólíkum lykilorðum. Maðurinn hefur ekki viljað aðstoða lögregluna við að opna þessar skrár.
Fyrir dómi kom fram að við eitt myndbandanna, sem maðurinn birti á djúpnetinu, hefðu 94.000 athugasemdir verið skráðar. Annað myndband, sem hann birti, fékk 600.000 áhorf.
