Dekan Singh Vig var nýlega fundinn sekur um að hafa myrt 86 ára föður sinn, Arjan Singh Vig, á heimili þeirra í Southgate í norðurhluta Lundúna í október 2021. Hann barði hann til bana með kampavínsflösku. Hann var ölvaður og í miklu reiðikasti þegar þetta gerðist.

Sky News segir að lögreglan hafi fundið 100 kampavínsflöskur og 10 kassa af viskíi, sem hafði verið pantað frá netverslun Amazon. Einnig fannst ein tóm viskíflaska í húsinu.

Fyrir dómi kom fram að lögreglumenn hafi fundið lík Arjan á svefnherbergisgólfi Dekan. Dekan, sem er 54 ára, var nakinn og við hlið hans um 100 kampavínsflöskur, þar á meðal blóðugar flöskur af Veuve Cliquot og Bollinger.

Ég drap föður minn. Ég lamdi hann í höfuðið með helvítis Bollingerkampavínsflösku,“ sagði hann við lögreglumennina.

Fyrir dómi sagði saksóknari að Arjan hefði verið lamin margoft í höfuðið með fullri kampavínsflösku og hafi hann hlotið mikla áverka og látist nær samstundis.

Dekan hafði búið með foreldrum sínum í fjögurra herbergja húsi þeirra í um 40 ár. Hann varð háður áfengi á meðan heimsfaraldur kórónuveirunnar stóð sem hæst. Hann var dæmdur í ævilangt fangelsi.