Þegar maðurinn hennar var í „strákaferð“ hafði hún tíma fyrir sig eina og kom sér fyrir í sófanum með fjölskyldutölvuna. Þar rakst hún á möppu sem hún hafði ekki séð áður.

Sími mannsins flutti myndir sjálfkrafa í iCloud og þaðan fluttust þær sjálfkrafa í þessa möppu í fjölskyldutölvunni.

Það voru ekki beinlínis fjölskyldumyndir í möppunni því þær voru kynferðislegs eðlis. Voru af eiginmanninum og annarri konu í ástarleikjum.

Østlands Posten segir að konan, sem býr í Noregi, hafi að vonum verið reið og ringluð yfir þessu og hafi hringt í manninn sinn. Hann svaraði ekki og því hringdi hún í „nýju konuna“ hans. Hún svaraði heldur ekki og sendi konan henni þá skilaboð og hótaði að senda foreldrum hennar klámfengnu myndirnar.

Hún fékk engin svör við þessu og hringdi þá í eiginmann hinnar konunnar sem sagði henni að eiginkonan væri í vinkonuferð og ætluðu þær að gista.

Næsta skref konunnar var því að senda myndirnar til eiginmanns hinnar konunnar og síðan birti hún þær í hópspjalli með mörgum vinum sínum.

Þetta endaði allt með rannsókn lögreglunnar og í janúar var konan fundin sek um að hafa deilt klámmyndum. Hún var dæmd til að sinna 50 klukkustunda samfélagsþjónustu.