Hellamálverk forfeðra okkar eru ein fárra leiða sem við höfum til öðlast innsýn í líf forfeðranna. Niðurstöður nýrrar rannsóknar benda til að hellamálverkin séu meira en bara listaverk.
The Guardian segir að á mörgum hellamálverkum, víða um Evrópu, sé einnig að finna frumstætt skrifmál sem forfeður okkar notuðu til að hafa yfirsýn yfir gang tunglsins og mökunarmynstur þeirra dýra sem þeir veiddu.
Þetta frumstæða skrifmál hefur fundist í 20.000 ára gömlum hellamálverkum og að sögn Paul Pettitt, prófessors í fornleifafræði við Durham háskólann og meðhöfundar rannsóknarinnar, þá er þetta elsta dæmið um að menn hafi gert dagatal og skrifað hluti niður.
Hann sagði að niðurstöðurnar sýni að veiðimenn/safnarar á ístímanum hafi verið þeir fyrstu til að nota kerfisbundið dagatal og til að skrá upplýsingar um stóra atburði í náttúrunni niður í dagatalið.
Lengi vel lék grunur á að hinir mörgu punktar, strik og aðrar merkingar, sem sjást á hellamálverkum, hafi haft ákveðna þýðingu. En það var ekki fyrr en áhugafornleifafræðingurinn Bennett Bacon eyddi „ótal“ klukkustundum við að sitja og ráða þessi merki sem það fékkst staðfest að þau hefðu ákveðna merkingu. Bacon er aðaldrifkrafturinn á bak við nýju rannsóknina.
Vísindamennirnir benda á að í raun sé ekki um tungumál að ræða því hér hafi aðeins grundvallarupplýsingar verið skráðar og yfirsýn verið höfð yfir gang tímans.
Vísindamenn vonast til að geta öðlast enn meiri skilning á þessu frumstæða ritmáli og að þei geti leyst fleiri hluta þess og þannig verði hægt að skilja hvernig upplýsingar forfeður okkar kunnu að meta.
