Harry prins segist ekki sjá eftir þeirri ákvörðun sinni að gefa upp fjölda þeirra talibana sem hann banaði í stríðinu í Afganistan. Kemur þetta fram í viðtali við prinsinn sem birtist í tímaritinu People í dag.
Segir hann að með því að með því að opna sig um fjöldann sé að hjálpa sjálfum sér að ná bata svo og að hjálpa öðrum í sömu stöðu.
Yfirmenn innan hersins segja það stríða gegn heiðri hermanna breska hersins að kasta fram tölu um fórnarlömb. Slíkt sé einfaldlega ekki rætt nema í einkasamtölum og aldrei í fjölmiðlum. Mannfall sé óhjákvæmilegur harmleikur í stríði, ekki númer til að haka í.
Sömu sérfræðingar segja að með yfirlýsingunni hafi Harry ekki bara sett sig, konu sín og börn í lífshættu, heldur einnig aðra meðlimi bresku konungsfjölskyldunnar svo og breska hermenn og almenning allan.
Mikilvægt fyrir hermenn að ræða hlutina opinskátt
En Harry heldur fast við sitt og segir í viðtalinu það vera mikilvægt fyrir hermenn að ræða opinskátt þann hluta hermennskunnar sem enn sæki á þungt á þá.
Sú yfirlýsing hefur reyndar komið á óvart þar sem Harry segist í bók sinni, Spare, ekki líta á hina föllnu talibana sem manneskjur heldur taflmenn sem nauðsynlegt hafi verið að fjarlægja.
Harry var tíu ár í hernum, frá 2005 til 2015, og fór tvær ferðir til Afganistan, 2007-2008 og 2012-2013. Hann fór í sex árásarferðir sem urðu 25 stríðsmönnum talibana að bana.
Yfirleitt vita hermenn ekki nákvæma tölu þeirra sem skotnir eru til bana úr árásarþyrlum líkt og þeim er Harry flaug en prinsinn segist hafa horft á upptökur úr myndavél þyrlunnar þegar snúið var aftur til herbúða að árásarferð lokinni auk þess að fletta upp í gagnabanka þyrlunnar.
„Mín tala er 25. Það er ekki tala sem fyllir mig einhverri gleði en ég skammast mín ekki heldur fyrir hana,” segir Harry í viðtalinu við People.
Talibanar hafa áður hótað Harry og öðrum meðlimum bresku konungsfjölskyldunnar vegna herþjónustu prinsins en sérfræðingar í öryggismálum segja að sú hætta hafi nú margfaldast.
Kallað eftir hefndaraðgerðum
Talsmenn talibana svo og aðrir öfgamenn jihadista kalla eftir hefnd og segja sérfræðingar að prinsinn þurfi að margfalda öryggisgæslu sína til að koma í veg fyrir mannrán eða jafnvel morð á honum, konu hans, Meghan, og börnum.
Harry hafi einnig sett aðra breska hermenn í hættu, alla konungsfjölskylduna svo og almenning, ekki síst fólk sem er statt á sömu svæðum og hann. Er þar til að mynda vísað til Invictus leikanna sem Harry stofnaði til en á þeim keppa fatlaðir hermenn í hinum ýmsu íþróttagreinum.
Harry hefur hingað til haft miklar áhyggjur af öryggismálum sínum og fjölskyldu sinnar og kemur því flestum á óvart að hann skuli taka áhættu sem þessa.
„Það er engin rétt eða röng leið til að vinna með þessar tilfinningar en í minni vegferð að bata veit ég að þögnin er að minnsta kosti ekki sú réttasta í stöðunni.
Með því að tjá mig um reynslu mína vonast ég til að geta hjálpað öðrum,” segir prinsinn í viðtalinu.
