Í gær hófust réttarhöld í Kaupmannahöfn yfir tveimur sænskum ríkisborgurum sem eru ákærðir fyrir skjalafals og peningaþvætti á 40,7 milljónum danskra króna en það svarar til um 800 milljóna íslenskra króna. Mennirnir voru handteknir á Kastrup flugvellinum í Kaupmannahöfn í febrúar á síðasta ári.

Ekstra Bladet segir að mennirnir hafi framvísað fölsuðum kórónupössum við innritun í flug Turkish Airlines til Tyrklands og hafi því verið teknir til skoðunar af tollvörðum. Mennirnir voru með fjórar ferðatöskur. Í þeim fundu tollverðir andvirði 4,6 milljóna danskra króna í dönskum, norskum og sænskum krónum auk evra og dollara. Í ákærunni kemur fram að mennirnir hafi vitað eða hafi haft grun um að peningarnir væru ávinningur brotastarfsemi.

Mennirnir neita báðir sök.

Hljóðskilaboð á arabísku voru leikin í dómsal í gær þar sem annar maðurinn heyrist spyrja hinn af hverju hann hafi bókað farmiða þeirra með lest og flugi saman. „Af hverju pantaðirðu ekki í sitt hvoru lagi, er það ekki öruggast?“ sagði hann.

Rannsókn lögreglunnar leiddi í ljós að mennirnir höfðu farið 15 ferðir frá Kaupmannahöfn til Istanbúl í Tyrklandi með ferðatöskur fullar af peningum. Lögreglan telur að þeir hafi samtalt flutt sem svarar til 40,7 milljóna danskra króna úr landi.