Hess játaði brot sín í júlí en dómur var fyrst kveðinn upp í gær. Hún rak útfararstofuna Sunset Mesa og rak um leið fyrirtækið Donor Services sem seldi líkamshluta.
Hún var fundin sek um að hafa hlutað 560 lík í sundur og selt líkamshluta. Móðir hennar, hin 69 ára Shirley Koch, játaði einnig sök. Hún var dæmd í 15 ára fangelsi.
Tim Neff, saksóknari, sagði að mæðgurnar hefðu notað útfararstofuna til að stela líkum og líkamshlutum með því að nota falsaðar yfirlýsingar um líffæragjafir.
Reuters segir að sala á líkamshlutum sé nánast stjórnlaus iðnaður í Bandaríkjunum. Það er ólöglegt að selja líffæri á borð við hjörtu, nýru og annað sem er notað við líffæraígræðslur.
En engin alríkislög ná yfir sölu á höfðum, handleggjum og hryggsúlum til rannsókna og kennslu. Það var einmitt þetta sem Hess stundaði.
Alríkislögreglan FBI hóf rannsókn á málinu eftir að Reuters birti greinar um sölu Hess á árunum 2016 til 2018 og gerði húsleit hjá útfarastofunni 2018.
Fyrir dómi kom fram að Hess sagði ættingjum að lík ástvina þeirra hefðu verið brennd og rukkaði þá um allt að 1.000 dollara fyrir líkbrennslu sem aldrei átti sér stað. Síðan seldi hún líkamshluta til ýmissa fyrirtækja. Þau vissu ekki að Hess stundaði ólöglega starfsemi.
