José Ribeiro, 62 ára gamall brasilískur karlmaður, var lagður inn á spítala febrúar síðastliðnum vegna krabbameins í tungu. Þann 29. nóvember síðastliðinn var hann svo úrskurðaður látinn af lækni á spítalanum. Í kjölfarið var Ribeiro settur í líkpoka og farið með hann í kæli í líkhúsinu. Fimm klukkustundum síðar var farið með hann á útfararstofu en þar tók árvökull starfsmaður eftir því að augu Ribeiro voru opin og að hann var að anda.

Brunað var með Ribeiro aftur upp á spítala en þar lést hann, í alvörunni í þetta skiptið, tveimur dögum síðar. Talið er að Ribeiro hafi dáið úr ofkælingu sökum þess að hann var í kælinum í líkhúsinu í fimm klukkustundir.

Fjölskylda Ribeiro er miður sín yfir andlátinu og furðar sig á því. „Það sem gerðist er ótrúlegt, bróðir minn var í fimm klukkustundir í plastpoka í kæli,“ segir systir hans um málið. „Þetta er hræðilegt og óásættanlegt.“

Lögreglan á svæðinu taldi í fyrstu að um slys væri að ræða en nú er þó annað uppi á teningnum. „Það að ofkæling sé orsök andlátsins eykur ábyrgðina á lækninum,“ segir í yfirlýsingu frá lögreglunni. Dr. Lucas Campos, lækninum sem úrskurðaði Ribeiro látinn, hefur verið vikið úr starfi samkvæmt Daily Mail. Þá segir einnig að nú sæti hann rannsókn vegna tilraunar til manndráps.