Fimm ára stúlka bjargaði lífi eins árs bróður síns eftir umferðarslys sem endaði með að bíll fjölskyldunnar endaði á hvolfi. Foreldrar þeirra létust í slysinu en þrjú börn þeirra lifðu það af.

Slysið átti sér stað á afskekktum stað í Western Ástralíu að sögn CNN.

Í tilkynningu frá lögreglunni segir að Land Rover Discover bíll fjölskyldunnar hafi fundist á þriðjudagsmorguninn í Kondinin, sem er um 280 km austan við Perth.

Foreldrar barnanna, Cindy Braddock 25 ára og Jake Day 28 ára, voru úrskurðuð látin á vettvangi.

Þrjú börn þeirra, 1, 2 og 5 ára, lifðu slysið af en voru föst í bílnum með látnum foreldrum sínum í um 55 klukkustundir í miklum hita.  Það voru síðan ættingjar þeirra sem fundu þau.

Tilkynnt var um hvarf fjölskyldunnar á mánudaginn eftir að hún skilaði sér ekki í jólaboð.

Michael Read, ættingi fjölskyldunnar, sagði í samtali við Nine News að 5 ára stúlkan hefði bjargað lífi yngsta bróður síns með því að losa hann úr bílstólnum. Read sagði að ef hún hefði ekki losað yngsta bróður sinn úr stólnum væri hann líklega ekki á lífi. „Hún mun væntanlega ekki vita hvað hún gerði fyrr en eftir mörg ár,“ sagði hann einnig.

Börnin voru flutt á sjúkrahús vegna alvarlegs vökvaskorts. Þau hlutu minniháttar líkamlega meiðsli og segir lögreglan að reiknað sé með að þau verði útskrifuð af sjúkrahúsi á næstu dögum.