Tinder-stefnumót sem fór fram í New York-borg í síðustu viku endaði með ósköpum. Þar á maður að hafa nauðgað konu sem er sökuð um að bregðast við með því að stinga hann í hálsinn og stela veskinu hans. New York Post greinir frá þessu.

Atvikið átti sér stað í íbúð konunnar í Manhattan, en maðurinn Milos Maglich, 29 ára, hefur verið handtekinn og kærður fyrir kynferðisbrot. Konan á að hafa margneitað honum um að stunda endaþarmsmök, og hann hótað því að nauðga henni. Síðan hafi hann ráðist á og nauðgað konunni, sem hafi stungið hann í sjálfsvörn.

Maglich heldur því fram að hann sé fórnarlambið, en ekki konan. Verjandi hans sagði hann neita sök. „Kærandinn stakk skjólstæðing minn í hálsinn og stal eigum hans.“ Hann gaf lögreglu skýrslu varðandi meint brot konunnar, en kvörtunum hans var vísað frá.

Er Maglich gekk úr réttarsal á laugardag spurði blaðamaður hann hvernig „Tinder-deitið“ hefði gengið. Hann svarði: „Já ég var stunginn í hálsinn.“