Alríkissaksóknarar í Bandaríkjunum segja að Juan Orlando Hernández, forseti Hondúras, hafi aðstoðað meinta fíkniefnasmyglara við að smygla mörgum tonnum af kókaíni til Bandaríkjanna. Fyrir þetta hafi hann fengið háar fjárhæðir. Hernández vísaði þessu á bug og sagði þetta ekki eiga við nein rök að styðjast.

CNN skýrir frá þessu. Fram kemur að saksóknarar í New York hafi nýlega lagt fram gögn fyrir dómi í máli Geovanny Funetes Ramirez sem er grunaður um fíkniefnasmygl. Meðal þessara gagna er framburður vitna um samninga og samskipti Ramirez og Hernández á árunum 2013 og 2014.

Forsetinn er þó ekki nefndur beint á nafn, aðeins er vísað til hans sem CC-4 en nákvæmar lýsingar á forsetaframboði hans fylgja og bróðir hans er nafngreindur svo ekki er erfitt að lesa hver á í hlut.

Hernández hefur ekki verið kærður vegna málsins. Fyrir tveimur árum staðfesti hann að hann væri til rannsóknar hjá bandarísku fíkniefnalögreglunni. Hann hefur alla tíð neitað öllum ásökunum um að hafa komið nálægt fíkniefnasmygli.