Enn einu sinni er taílenska eyjan Koh Tao í sviðsljósinu vegna dularfullra mannsláta. Eyjan er paradís kafara en á síðustu árum hafa nokkrir ferðamenn verið myrtir á eyjunni og aðrir hafa tekið eigið líf. Þessir óhugnanlegu atburðir hafa orðið til þess að þessi annars svo friðsæla og fallega eyja er af sumum kölluðu „Dauðaeyjan“.

Á föstudaginn fundust hjónin Rakeshwar Sachathamakul, 59 ára, og 55 ára eiginkona hans, Anshoo, látin í sundlaug á lúxushóteli. Þau voru milljónamæringar sem höfðu auðgast á hótelrekstri. Það var sonur þeirra sem kom að þeim eftir strandferð. Þau voru úrskurðuð látin á vettvangi. Thai Examiner skýrir frá þessu.

Hefur blaðið eftir talsmanni lögreglunnar að hjónin hafi verið á barnum við sundlaugina áður en þau fóru í laugina til að synda.

Eftirlitsmyndavélar við laugina hafa verið bilaðar mánuðum saman og því ekki hægt að styðjast við upptökur úr þeim við rannsókn málsins. Ekki mátti nota laugina vegna sóttvarnaaðgerða vegna kórónuveirunnar en það bann virðast hjónin ekki hafa virt. Bráðabirgðaniðurstaða krufningar er að þau hafi drukknað en lögreglan vill ekki útiloka að eitthvað glæpsamlegt hafi átt sér stað.