Niðurstöður rannsóknarinnar sýna að það geta verið allt að 36 samfélög vitsmunavera í vetrarbrautinni okkar en hún varpar einnig ljósi á hver örlög okkar sem tegundar geta orðið. Óhætt er að segja að líkurnar á því að við verðum langlíf tegund séu mun minni en við héldum.
„Það ættu að vera nokkrir tugir vitsmunasamfélaga í vetrarbrautinni okkar ef miðað er við að það taki 5 milljarða ára fyrir vitsmunalíf að þróast á öðrum plánetum eins og hér á jörðinni.“
Er haft eftir Christopher Conselice, hjá University of Nottingham, í fréttatilkynningu.
En þótt þetta sé rétt þá er ekki þar með sagt að við getum komist í samband við þessar vitsmunaverur á næstunni. Til að staðfesta að þær séu til verðum við að treysta á að nema merki frá þeim, þar á meðal útvarps- og sjónvarpssendingar. Ef tæknivædd samfélög hafa verið til jafnlengi og okkar þá erum við ekki að fara að heyra frá þeim á næstunni eða eiga í samskiptum við þær. Meðalfjarlægðin til hugsanlegra vitsmunavera er 17.000 ljósár en það gerir öll samskipti óneitanlega mjög erfið. Svo má auðvitað ekki gleyma þeim möguleika að við séum einfaldlega eina vitsmunalífið í vetrarbrautinni og hugsanlega alheiminum og að önnur vitsmunalíf deyi út áður en við finnum þau.
„Nýja rannsóknin okkar bendir til að leitin að vitsmunalífi utan jarðarinnar varpi ekki eingöngu ljósi á hvernig líf verður til heldur gefur hún okkur einnig vísbendingu um hversu lengi okkar eigin menning mun vara. Ef við komumst að því að vitsmunalíf sé algengt þá segir það okkur að menningarheimur okkar gæti lifað mun lengur en nokkur hundruð ár. Ef við komust að því að engin önnur samfélög vitsmunavera séu í vetrarbrautinni okkar þá eru það slæm tíðindi um hversu lengi við munum verða til. Með því að leita að vitsmunalífi utan jarðarinnar, jafnvel þótt við finnum ekkert, þá erum við að varpa ljósi á framtíð okkar og örlög.“
Er haft eftir Conselice.
