Kristeligt Dagblad skýrir frá þessu og byggir á rannsóknargrein eftir Lene Kühle sem er einn fremsti sérfræðingur Danmerkur í rannsóknum á moskum.
Þegar moskan, sem heitir Hamad Bin Khalifa Civilization Center, var opnuð 2014 stóð hún styrkum fótum fjárhagslega. En nú er staðan önnur, innri átök og svo slæm fjárhagslega staða að ekki er annað að sjá en moskan rambi á barmi gjaldþrots segir Kühle í grein sinni. Hún byggir hana á rannsóknum og skjölum sem hún fékk aðgang að á grunni upplýsingalaga. Í niðurstöðu sinni segir hún að moskan eigi við mikil fjárhagsvandræði að etja þrátt fyrir að hafa fengið mikið fé frá Katar og Kúveit.
Í upphafi fékk moskan sem svarar til um 2,6 milljarða íslenskra króna frá yfirvöldum í Katar og ýmsum samtökun. Síðan bárust meiri peningar frá þessum aðilum en svo virðist sem þeir hafi hætt að koma á einhverjum tímapunkti en ekki er ljóst hvenær það gerðist.
Þá eru deilur innan moskunnar á milli ólíkra fylkinga. Talað er um að Hizb ut-Tahrir eða önnur álíka samtök séu að reyna að taka stjórn hennar yfir. Samtökin eru harðlínusamtök sem stefna á að koma upp múslimsku kalífadæmi.
