Bandaríska vísindakonan Dr. Suzanne Eaton, sem starfar fyrir Max-Planck stofnunina í Þýskalandi, fannst myrt á grísku eyjunni Krít fyrir skömmu. Dr. Eaton er 59 ára gömul. Lík hennar fannst í gömlu neðanjarðarbyrgi. Í dag var ungur fjölskyldufaðir handtekinn, grunaður um morðið og samkvæmt frétt þýska miðilsins Bild hefur hann játað morðið á sig munnlega við lögreglu.

Maðurinn er 27 ára gamall, er giftur og á börn. Hann er talinn eiga við geðrænan vanda að stríða. Engir áverkar voru sjáanlegir á líki vísindakonunnar og var talið að hún hefði kafnað. En þar sem lík hennar var í poka og var komið fyrir í neðanjarðarbyrgi þótti víst að hún hefði verið myrt.

Samkvæmt frétt Bild hefur maðurinn sagt við lögreglu að morðið hafi verið af kynferðislegum toga. Hann sé „gægir“ eða „Voyeur“ og konan virðist hafa haft kynferðislega örvandi áhrif á hann.

Maðurinn var handtekinn á grundvelli lífsýna sem fundust í bíl hans.