Dmitry Obretetsky, rússneskur milljarðamæringur, lést af völdum áverka sem hann hlaut þegar bifreið var ekið á hann í Surrey á Englandi þann 25. nóvember. Lögregla hefur leitað ökumannsins en án árangurs og útilokar vinur Dmitry ekki að ekið hafi verið á vin hans viljandi.

Dmitry var 49 ára og fæddur og uppalinn í Volgograd. Hann hagnaðist mikið við fall Sovétríkjanna en flutti síðar til Bretlands þar sem hann var búsettur ásamt eiginkonu og syni. Dmitry var úti að ganga með hundinn sinn þegar ekið var á hann, en hundurinn drapst í slysinu.

Í frétt Mail Online er bent á að nokkur fjöldi valdamikilla Rússa hafi látist við dularfullar kringumstæður í Surrey og nágrenni á undanförnum misserum. Badri Patarkatsisvili, Alexander Peripilichnyy og Boris Berezovsky eru nefndir í því samhengi.

Pavel Brovkov, vinur Dmitrys, veltir fyrir sér hvort Dmitry hafi verið ráðinn bani. „Fólk ekur almennt mjög varlega í Bretlandi og ég vil ekki útiloka að hann hafi verið ekinn niður viljandi.“

Lögreglan í Surrey fer með rannsókn málsins og hefur biðlað til hugsanlegra vitna að gefa sig fram.