Karlmaður var handtekinn nýlega á flugvellinum í Miami í Flórída þegar flugvél, sem hann hafði flogið með frá Denver, lenti þar. Hann var ofurölvi og með ungan son sinn meðferðis. Maðurinn hafði káfað á sessunaut sínum á leiðinni, konu, að syni sínum viðstöddum.

Í frétt New York Post kemur fram að maðurinn hafi boðið konunni litla vodkaflösku. Hún afþakkaði og reyndi að koma sér fyrir til að sofa en skyndilega fann hún að maðurinn snerti aftanvert læri hennar og rass. Hún taldi í fyrstu að um óviljaverk hefði verið að ræða en þegar hönd mannsins færðist á innanvert lærið áttaði hún sig á að hér var ekki um óviljaverk að ræða.

Konan yfirgaf síðan sætið sitt og tilkynnti flugliðum um málið. Hún fékk sæti annarsstaðar í vélinni og brast í mikinn grát að því er segir í dómsskjölum.