Á Alþingi í vikunni stigu nokkrir þingmenn upp í pontu og auglýstu eftir ríkisstjórn landsins. „Er hún hætt?“ spurði Oddný G. Harðardóttir, þingmaður Samfylkingarinnar. Þorsteinn Víglundsson, þingmaður Viðreisnar, spurði hvort stjórnin væri farin í langt vetrarfrí. Tilefni gagnrýninnar er skortur á málum frá ríkisstjórninni, sérstaklega málum sem stjórnin hafi boðað og fjöldi mála frá þingmönnum sem séu send í nefndir að því er virðist til að daga uppi. Um sé að ræða gífurlega sóun á tíma Alþingis að láta mæla fyrir málum bara til að þau endi í nefndum þar sem ekkert sé gert við þau. Þingmannamál hafi haldið uppi dagskrá Alþingis en samt komist fá mál í gegn. Oddný Harðar nefndi að einnig væru dæmi um að nefndarformenn felli frekar niður fundi heldur en að taka þessi mál fyrir, þótt þau séu um 2/3 þeirra mála sem fjallað hafi verið um á þessu þingi. Líklega er eðilegt að þingmenn spyrji sig hvar ríkisstjórnin sé, enda gífurleg sóun á skattpeningum að eyða tíma í þras og mas til einskis.