Ung kona bjó á dögunum til könnun í Facebookhópnum Mæðra tips þar sem spurt er: „Góður kvensjúkdómalæknir?“ Hún hvetur síðan konur til að bæta við valmöguleikum og kjósa sinn uppáhalds kvensjúkdómalækni.
Mæðra tips er vettvangur fyrir allar mæður, og verðandi mæður, þar sem hægt er að deila ráðum og skiptast á skoðunum um hagnýt málefni. Það skiptir allar konur máli að vera hjá góðum kvensjúkdómalækni því fátt meira aðkallandi en að heyra hverjir eru að standa sig í stykkinu.
Mörg hundruð konur hafa tekið þátt í könnuninni og þegar þessar línur eru skrifaðar trónir Arnar Hauksson á toppum. Arnar er með þekktari kvensjúkdómalæknum landsins og vakti mikla athygli þegar hann var fenginn til taka að sér hlutverk í sjónvarsþáttunum Pabbahelgar þegar aðalpersónan Nanna þurfti að fara til kvensjúkdómalæknis. Eftir þáttinn sagði Arnar í samtali við Síðdegisútvarpið, léttur í bragði: „Ég var bara að vinna vinnuna mína.” Eftir að þáttastjórnendur greindu Arnari frá því að hann hefði rokið upp frægðarlistann á IMDB (Internet Movie DataBase) eftir birtinguna bætti hann við: „Ég er samt ekki búinn að fá Óskarstilnefnginguna ennþá.”
Könnunin á Mæðra tips er vitanlega ekki vísindarannsókn en ætti þó að gefa ágæta hugmynd um vinsælustu kvensjúkdómalæknana.
Blaðamaður sló á þráðinn til Arnars og sagði honum tíðindin. Hann viðurkenndi þá að vera sjálfur ekki á Facebook, hvað þá í lokuðum hópi mæðra, en var þó harla ánægður með fregnirnar: „Segjum sem svo að það sé ekki hægt að keppa í læknisfræði en ef þetta er túlkun þeirra stúlkna sem kjósa þá er ég afar þakklátur fyrir að mín störf séu vel metin. Maður getur ekki annað en verið stoltur af þessu.”
Næstvinsælasti kvensjúkdómalæknir landsins, samkvæmt þessari óformlegu könnun er Ólafur M. Håkansson. Bera þeir Arnar nokkuð af í kosningunni en báðir eru gamlir í hettunni, á ýmsa vegu.
Þar á eftir koma þau Ásgeir Thoroddsen, Svanhvít Hekla Ólafsdóttir og Kristín Andersen.
Tekið skal fram að konan sem gerði könnunina gaf DV góðfúslegt leyfi til að birta niðurstöðurnar.
