,,Mér finnst þetta þreyttasta fréttin sem kemur,” segir Ólafur Darri Ólafsson um fréttir af því þar sem geðlyfjanotkun Íslendinga er sett upp með þeim hætti að það búi til skömm hjá þeim sem þurfa að nota þau.

Ólafur Darri var í viðtali í nýju podcasti Sölva Tryggvasonar. Ólafur var mjög áhyggjufullur og þungur þegar versti hluti Covid tímabilsins gekk yfir. Ólafur glímir oft við tímabil þar sem hann verður kvíðinn og þunglyndur og hann tók dýfu þegar Covid faraldurinn gekk yfir. Hann var bæði hræddur um heilsu annarra og eigin heilsu. Líklega spilaði inn í að hann hafi hætt að geta farið í sund. Hann fer reglulega í sund og syndir einn kílómetra í senn.

Tók reglulega lyf við kvíða og þunglyndi

Í viðtalinu segir Ólafur Darri að hann hafi reglulega þurft að taka lyf við kvíða og þunglyndi. Eins hafi hann á löngum köflum þurft á svefnlyfjum að halda. Hann skilur ekki fordóma gagnvart þeim sem leita sér hjálpar og notast við þau verkfæri sem í boði eru. Ólafur hefur notið aðstoðar sálfræðings og geðlæknis við að komast á miklu betri stað. Hann segir besta lausnin sé að sjálfsögðu að notast við blöndu af öllum aðferðum til að ná sér í betra stand ef fólk upplifir mikla vanlíðan. Skömm vegna lyfja sé aftur á móti algjörlega fráleit.

Í viðtalinu fara Ólafur Darri og Sölvi yfir leiklistina, launamálin, dýpstu dalina og hæstu hæðirnar.

Viðtal Sölva og Ólafs Darra er aðgengilegt á öllum helstu hlaðvarpsveitum. Einnig má sjá það í spilaranum hér að neðan.

[youtube https://www.youtube.com/watch?v=34nmss8yWj4&w=560&h=315]