Í tilkynningu frá lögreglunni á höfuðborgarsvæðinu segir að enn sem komið er sé ekkert sem bendi til þess að menn frá Palestínu sem handteknir voru vegna líkamsárásar í bílakjallara Höfðatorgs í Reykjavík hafi tengsl við Hamas-samtökin. Tilkynningin er svohljóðandi:

„Vegna umfjöllunar Morgunblaðsins og mbl.is um rannsókn Lögreglunnar á höfuðborgarsvæðinu á alvarlegri líkamsárás í Túnahverfi í Reykjavík í síðustu viku vill embættið taka sérstaklega fram að á þessu stigi bendir ekkert til þess að þeir sem hafa verið handteknir í málinu hafi tengsl við Hamas-samtökin. Þá er það enn fremur rangt að hinir sömu séu á lista alþjóðalögreglunnar yfir grunaða hryðjuverkamenn.“

„Rannsókn málsins er annars í fullum gangi og er í algjörum forgangi hjá embættinu. Hún er mjög viðamikil og tímafrek eftir því, en tveir sitja nú í gæsluvarðhaldi í þágu rannsóknarinnar.“