Ný skoðanakönnun sem gerð var í Bretlandi sýnir að meirihluti fólks væri óánægt að fá notaðan hlut í jólagjöf. Meirihluti myndi einnig sjálfur gefa notaða jólagjöf og ekki segja frá því.
Könnunin var framkvæmd af flutningsfyrirtækinu Pack & Send. Vandasamt er að velja jólagjafir enda hefur verið greint frá því að um að gjöfum er hent, sem jafngildir verðmæti upp á 42 milljón punda. Það er tæplega 8 milljarðar króna.
Til að koma í veg fyrir sóun hafa íbúar í Bretlandi verið hvattir til þess að gefa notaða hluti, til dæmis um jólin.
En þetta er ekki svo einfalt. Samkvæmt könnun Pack & Send, þá sögðust 60 prósent vera á móti því að fá notaðan hlut í jólagjöf. Þar af sögðust um 20 prósent líta þá það sem hreina móðgun ef einhver myndi gefa þeim notaðan hlut. 30 prósent sögðu það sýna nirfilshátt að gefa notaðan hlut.
Í sömu könnun sögðust hins vegar 68 prósent svarenda að þeir myndu gefa notaðan hlut en ekki segja frá því að hann væri notaður.
Málið snýst ekki allt um efnahag. Hér eru ýmsir sálfræðilegir þættir að verki.
„Notaðar gjafir geta haft þá merkingu að vera ódýrari eða minna hugulsöm en gjöf keypt beint úr verslun,“ segir rithöfundurinn og sálfræðingurinn Eloise Skinner. Það er að sumir beintengja fjárhæðina við hugulsemi.
„Fólki líður vel með að kaupa notaða hluti handa sjálfu sér en gæti hikað við að gefa eða þiggja þá vegna félagslegrar táknfræði sem tengist gjöfum eða þeirrar persónulegu merkingar sem þær leggja í þær,“ segir sálfræðingurinn Daniel Glazer.
