Maður á tíræðisaldri var handtekinn í Kaliforníu fyrir að skjóta eiginkonu sína til bana á bílastæði. Ekki hefur verið greint frá hvers vegna hann framdi þetta ódæði.
Tímaritið People greinir frá þessu.
Maðurinn, sem heitir Richard Hocking, og er 93 ára að aldri hringdi og gaf sig fram við lögregluna í borginni Fremont, skammt frá San Francisco, laust eftir hádegi síðastliðinn laugardag, 3. janúar. Sagðist hann hafa skotið eiginkonu sína.
Lögregla var send á staðinn og sagt að þar væri maður sem vildi gefa sig fram. Þegar lögregluþjónar komu á staðinn, um klukkan 12:22, stóð Richard við hliðina á bílnum sínum. Inni í bílnum sáu þeir eiginkonu hans meðvitundarlausa alvarlega særða.
Skömmu seinna var konan úrskurðuð látin á staðnum. Ekki hefur verið greint frá nafni hennar en hún var 86 ára gömul.
Richard Hocking var handtekinn og færður á lögreglustöðina í Fremont. Að sögn lögreglu gaf hann þar skýrslu og greindi þar frá því hvers vegna hann skaut eiginkonu sína. Lögreglan hefur hins vegar ekki greint frá þeim vitnisburði.
Var hann færður í gæsluvarðhald og ákærður vegna gruns um morð með byssu. Saksóknarinn í Alameda sýslu mun fara með málið fyrir hönd ákæruvaldsins.
Í frétt People um málið segir að óvíst sé hvort að Richard Hocking sé búinn að fá verjanda í málinu. Hafi blaðið spurst fyrir um það en saksóknaraembættið ekki svarað.
Í Fremont búa um 230 þúsund manns, en um 7,6 milljón á öllu Flóasvæðinu í kringum San Francisco. Lögreglan í borginni hefur sagt málið vera einangrað atvik og íbúar þurfi ekki að hafa áhyggjur.
Ekki er algengt að fólk á tíræðisaldri fremji alvarleg afbrot, hvað þá morð. Það er þó ekki einsdæmi.
Til að mynda var 95 ára kona, Galina Smirnova, ákærð í haust fyrir morð á 89 ára gamalli konu sem deildi með henni herbergi á dvalarheimili í Brooklyn hverfi í New York borg.
Fórnarlambið, Nina Kravtsov, var fædd í Úkraínu og hafði lifað helförina af. Talið er að Smirnova hafi barið hana til dauða í höfuðið og andlit með fótstigi af hjólastól.
