Tveir íbúar í Reykjanesbæ urðu fyrir því að Reykjanesbær tæmdu geymslur sem þeir voru með á leigu að Ásbrú og ýmist hentu því sem var í geymslunum eða gáfu það til Fjölsmiðju Suðurnesja.

RÚV greindi frá þessu og ræddi við annan íbúann, Kristínu Dögg Josézinho Guðmundsdóttur. Hún segir að stjúpdóttir sín hafi tekið geymslu á leigu á Ásbrú. Í geymslunni var öll búslóð hennar, þar sem hún hafði nýlega flutt inn til Kristínar. Þar hafi hún meðal annars geymt sjónvarp, rúm, uppþvottavél og flest annað í hennar eigu þar sem hún hefði ekki þurft slíkt á meðan hún bjó hjá Kristínu og leitaði að öðru húsnæði.

„Þegar hún fer í geymsluna sína og ætlar að fara með dót og sækja aðra hluti núna í desember þá kemur hún bara að opinni hurð og geymslan er galtóm,“ segir Kristín í viðtali við RÚV.

Kom í ljós að starfsmenn sem þetta gerðu töldu allar geymslurnar vera í leigu hjá bænum.

Kristín Dögg hefur kært athæfið til lögreglu. Starfsmaður Reykjanesbæjar hafi viðurkennt í samtali að geymslurnar hafi verið opnaðar og tæmdar.

Reykjanesbær hefur ekki viljað bæta tjónið en Kristín Dögg vonast til þess að bærinn sjái að sér og greiði eðlilegar bætur fyrir það sem var tekið.