Lögrega fékk tilkynningu um mann í annarlegu ástandi í gistiheimili í miðborginni. Hafði hann sett brunakerfi  staðarins í gang svo vatn flæddi um allt og varð töluvert eignatjón af þessu. Var maðurinn handtekinn og vistaður fyrir rannsókn málsins. 

Frá þessu segir í dagbók lögreglu.

Þar segir einnig frá því að töluvert magn fíkniefna fannst í bíl hjá ökumanni sem stöðvaður var í umdæmi lögreglustöðvar 3 (Kópavogur og Breiðholt). Hafði lögregla afskipti af manninum vegna gruns um akstur undir áhrifum fíkniefna. Reyndist það sannarlega vera. Grunsemdir vöknuðu þá um að hann væri með fíkniefni í bílnum og fannst við leit töluvert magn ætlaðra fíkniefna og gögn þess efnis að hér væri um sölu og dreifingu að ræða. Við frekari leit á heimili mannsins fundust fjármunir og meira af ætluðum fíkniefnum. Maðurinn var fluttur á lögreglustöð þar sem hann var vistaður í þágu rannsóknar málsins.