Tveir enskir nýnasistar í bænum Bentley í Miðlöndunum uppskáru lítið annað en hlátrasköll þegar þeir máluðu danska fánann á götu úti. Gert var stólpagrín að þeim á samfélagsmiðlum.
Í sumar hafa hægri öfgamenn í Bretlandi ítrekað málað enska fánann á götur, veggi, ljósastaura og fleiri opinbera og sýnilega staði. Kallast aðgerðin „Operation Raise the Colours“ og kalla gerendurnir sig „Patriots“, það er föðurlandsvini.
Í blaðinu Metro er greint frá tveimur ansi misheppnuðum nýnasistum, með fánalambhúshettur, sem máluðu götu í Bentley um helgina. En í stað enska fánans, það er kross heilags Georgs, þá máluðu þeir þann danska, Dannebrog. Sem er litalega séð öfugur við þann enska.
„Víkingarnir eru að koma!“ sagði einn netverji og bætti við trúðatjákni í færslu sinni.
„Svo stoltir að þeir þora ekki einu sinni að sína á sér andlitið. Rjómi Bretlands,“ sagði annar.
Enn annar benti á að þetta væru skemmdarverk og að þau hefðu afleiðingar.
„Það verða skattpeningarnir okkar sem verða notaðir til að þrífa þetta upp. Hver er tilgangurinn? Þvílíkir hálfvitar,“ sagði hann.
