Börnin sem létust þegar árásarmaður hóf skothríð í kapellu í kaþólskum skóla í Minneapolis á miðvikudag hétu Fletcher Merkel og Harper Moyski. Merkel var átta ára en Moyski tíu ára.

Sautján til viðbótar særðust í árásinni, þar á meðal fjórtán börn á aldrinum 6 til 15 ára. Eitt þeirra er enn talið vera í lífshættu.

Árásarmaðurinn hét Robin Westman, áður Robert, og var 23 ára. Lögregla segir að Robin hafi birt einhvers konar stefnuskrá á netinu áður en árásin var framkvæmd og segir lögregla að árásin sé rannsökuð sem hatursglæpur og hryðjuverk.

Foreldrar Harper sendu frá sér yfirlýsingu í gær þar sem henni var lýst sem glaðværri og ástsælli tíu ára stúlku sem var dýrkuð af yngri systur sinni.

„Sem fjölskylda erum við í molum, og orð ná ekki að lýsa þeirri djúpu sorg sem við upplifum,“ sagði í yfirlýsingu foreldranna. Segjast þau vonast til þess að minning Harper verði hvatning til aðgerða sem gætu komið í veg fyrir sambærilegar árásir í framtíðinni.

„Við hvetjum samfélagið okkar til að stíga raunveruleg skref í átt að því að takast á við þá byssuvá og geðheilbrigðiskrísu sem ríkir í þessu landi.“

Faðir Fletcher las upp yfirlýsingu í gær fyrir utan kapelluna þar sem sonur hans var myrtur.

Hann sagði að Fletcher hefði elskað fjölskyldu sína og vini og notið þess að veiða, elda og spila íþróttir. Vegna gjörða árásarmannsins muni fjölskyldan aldrei geta haldið utan um hann aftur, talað við hann eða fylgst með honum vaxa og dafna í þann dásamlega unga mann sem hann var á leiðinni að verða.

„Vinsamlegast munið Fletcher fyrir þann sem hann var, en ekki verknaðinn sem batt enda á líf hans,“ sagði Merkel sem bætti við að þrátt fyrir allt væri hann þakklátur viðbragðsaðilum. Án aðkomu þeirra hefði þessi harmleikur getað orðið margfalt stærri.