Lögmenn ekkju og sonar Hjörleifs Hauks Guðmundssonar varðandi krefjast 20 milljóna króna í miskabætur þeim til handa. Mbl.is greinir frá.
Þeir Stefán Blackburn, Lúkas Geir Ingvarsson og Matthías Björn Erlingsson eru ákærðir fyrir manndráp, frelsissviptingu, rán og tilraun til fjárkúgunar. Ung stúlka er ákærð fyrir hlutdeild í frelsissviptingu og ráni með því að hafa sett sig í samband við Hjörleif símleiðis og lokkað hann út í bíl til Stefáns og Lúkasar.
Lögmennirnir krefjast þess að þessi fjögur verði dæmd til að greiða miskabætur. Fimmti maðurinn er ákærður fyrir peningaþvætti með því að hafa tekið við greiðslu úr einkabanka Hjörleifs og lagt inn á reikning Matthísar Björns.
„Þá sagði hún [lögmaðurinn] að sakborningarnir hafi reynt að ýja að því að ástæða þess að málið hafi farið úr böndunum hafi verið að ekkjan hafi elt bíl Stefáns í Þorlákshöfn. Þetta sýni meðal annars að iðrun þeirra sé engin,“ segir í fréttinni og að aðdróttanir sakborninganna hafi verið ekkjunni mjög þungbærar.
Karl Ingi Vilbergssson, saksóknari í málinu, krefst þess að þeir Stefán, Lúkas og Matthías verði dæmdir í minnst 16 ára fangelsi. Þó megi gefa afslátt af refsingu Matthíasar vegna ungs aldurs hans, en hann er 19 ára. Vísir greinir frá þessu.
„Í ræðu sinni fyrir dómi lýsti Karl Ingi miklu innbyrðis misræmi í framburði sakborninganna þriggja, og sagði þá einnig á skjön við rannsóknargögn málsins. Þeir væru að fegra sinn hlut til að gera sem minnst úr eigin þætti,“ segir í frétt Vísis.
Karl Ingi krefst tveggja ára fangelsis yfir stúlkunni sem lokkaði Hjörleif heitinn út í bíl til mannanna, en þar af verði þrír mánuðir skilorðsbundnir. Krafist er þriggja mánaða skilorðsbundins dóms yfir piltinum sem ákærður er fyrir peningaþvætti í málinu.
