Rúmlega fertugur maður sem situr í gæsluvarðhaldi vegna rannsóknar á stuldi á hraðbanka Íslandsbanka í Mosfellsbæ, aðfaranótt þriðjudagsins 19. ágúst, mun bera vitni í Gufunesmálinu næstkomandi föstudag. Eins og margoft hefur komið fram varðar Gufunesmálið andlát Hjörleifs Hauks Guðmundssonar, 65 ára manns frá Þorlákshöfn sem lést eftir að hafa verið numinn brott skammt frá heimili sínu í Þorlákshöfn að kvöldi 10. mars og þurft að þola miklar misþyrmingar í kjölfarið.
Eins og greint var frá í fréttum í gær hefur hraðbankinn verið endurheimtur og allt það fé sem í honum var, 22 milljónir króna. Var skurðgröfu beitt við verkið og hraðbankinn rifinn út og farið á brott með hann.
Hinn grunaði er 41 árs gamall fjölskyldufaðir. Auk gruns um hlutdeild í hraðbankastuldi er maðurinn grunaður um þátttöku í ráni á fjármunum úr flutningabíl í Hamraborg vorið 2024, en það mál er enn í rannsókn lögreglu.
Samkvæmt heimildum DV hefur hann náin tengsl við Stefán Blackburn, einn sakborninganna í Gufunesmálinu. Í eins og hálfrar klukkustundar löngu myndbandi sem spilað var í Héraðsdómi Suðurlands á mánudag sjást þeir Stefán og umræddur maður eiga í samskiptum kvöldið sem ferðin örlagaríka til Þorlákshafnar var farin.
Maðurinn var handtekinn við rannsókn Gufunesmálsins í marsmánuði og sat í gæsluvarðhaldi. Var hann grunaður um hlutdeild í mannráni og fjárkúgun. Í dag er ekki talið að hann hafi átt hlut að máli, í það minnsta er hann ekki á meðal ákærðu í málinu. Hann er hins vegar talinn búa yfir upplýsingum um sakborninga og er þess vegna kallaður til vitnis.
Þegar maðurinn var handtekinn fannst hann á hótelberbergi með stúlkunni sem ákærð er fyrir hlutdeild í frelsissviptingu og ráni í Gufunesmálinu, en hlutverk hennar í brotunum var að hringja í Hjörleif heitinn og þykjast mæla sér mót við hann. Stúlkan, sem er tvítug, og maðurinn, eru sögð hafa átt í ástarsambandi, rétt eins og dvöl þeirra á hótelherberginu er sterk vísbending um. Stúlkan bar fyrir dómi á mánudag að á þessum tíma hafi hún verið í daglegri kannabisneyslu en farið í meðferð í apríl síðastliðinn. Ljóst er að stúlkan og maðurinn voru saman á hótelberhergi kvöldið örlagaríka þegar Hjörleifur var numinn á brott í kjölfar símtala frá stúlkunni þar sem hún þóttist mæla sér mót við hann.
Maðurinn er sagður hafa náð tökum á lífi sínu eftir erfiða tíma. Árið 2009 var hann dæmdur fyrir eignaspjöll og árið 2013 var hann dæmdur fyrir umferðarlagabrot, þjófnaði, hylmingu fíkniefnalagabrot.
Eftir að hafa tekið út dóm er maðurinn sagður hafa snúið lífi sínu til betri vegar og var þar lykilatriði að hann sneri baki við fíkniefnaneyslu. Hann eignaðist eiginkonu og börn og starfaði í byggingariðnaðinum.
Hann er hins vegar sagður hafa misst tök á lífi sínu aftur á allra síðustu árum vegna fíkniefnaneyslu og spilafíknar. Er hann sagður vera stórskuldugur.
