Það vakti nokkra athygli í gær þegar greint var frá því að Ágúst Ólafur Ágústsson hefði verið ráðinn aðstoðarmaður Guðmundar Inga Kristinssonar, mennta- og barnamálaráðherra.

Ágúst Ólafur er fyrrverandi þingmaður Samfylkingarinnar og var til dæmis varaformaður flokksins á árunum 2005 til 2009.

Sjá einnig: Ágúst Ólafur færir sig frá borginni eftir stutt stopp yfir í menntamálaráðuneyti

Staksteinar Morgunblaðsins gera málið að umtalsefni og segir höfundur að ýmislegt áhugavert sé við ráðninguna á Ágústi Ólafi.

„Spyrja má hve lengi Ágúst Ólaf­ur hafi verið fé­lagi í Flokki fólks­ins því aðstoðar­menn ráðherra eru ekki eins og hverj­ir aðrir rit­ar­ar og tösku­ber­ar; auk þeirra skyldna eru þeir nefni­lega póli­tísk­ir trúnaðar­menn ráðherra,“ segir í Staksteinum í dag.

„Svo verður ekki nú. Öllum er ljóst að Ágúst Ólaf­ur, fv. vara­formaður Sam­fylk­ing­ar, er yf­ir­frakki Sam­fylk­ing­ar á ráðherra Flokks fólks­ins, sem hvorki virðist valda né hafa áhuga á viðkvæm­um mála­flokki grunn­skóla. „Ég nenni ekki einu sinni að gá að því,“ var svar hans við spurn­ingu um hvers vegna sam­ræmd próf hefðu verið af­lögð,“ segir enn fremur og vísar staksteinahöfundur í viðtal Bítisins á Bylgjunni við Guðmund Inga á dögunum sem mbl.is fjallaði um.

Segir höfundur það „algjöra nýlundu“ að stjórnarflokkur skipi ráðherra annars flokks pólitískan gæslumann.

„En hver veit? Kannski fyrri rík­is­stjórn lifði enn hefði Svandísi Svavars­dótt­ur hug­kvæmst og fengið að gera Björn Val Gísla­son að aðstoðar­manni Jóns Gunn­ars­son­ar,“ segir enn fremur og skýtur staksteinahöfundur á Heiðu Björgu Hilmisdóttur borgarstjóra að lokum.

„En svo er áhyggju­efni fyr­ir bæði borg­ar­búa og Heiðu Björgu Hilm­is­dótt­ur, sem varð borg­ar­stjóri fyr­ir aðeins hálfu ári, hvað henni helst illa á aðstoðarmönn­um. Katrín M. Guðjóns­dótt­ir ent­ist ekki í þrjá mánuði hjá henni og Ágúst Ólaf­ur í aðeins tíu vik­ur.“