Í skeyti frá lögreglu nú í morgunsárið kemur fram að haft hafi verið uppi á krökkunum í nærliggjandi götu þar sem nokkur af þeim voru verulega ölvuð. Var börnunum komið heim til foreldra sinna.
Lögreglu var tilkynnt um mann í annarlegu ástandi á veitingastað í miðborginni. Hann gerði sig líklegan til þess að girða niður buxurnar fyrir framan aðra gesti og veitast að starfsmönnum. Maðurinn, sem var verulega ölvaður, var handtekinn vegna málsins.
Þá var tilkynnt um annan einstakling sem var ber að ofan að öskra út í loftið í annarlegu ástandi. Vitni sagði hann hafa öskrað á fólk og barið í rúður veitingastaðar. Viðkomandi brást illa við afskiptum lögreglu en hann var handtekinn á vettvangi sökum ástands hans. Hann sagðist vera búinn að drekka einn lítra af vodka. Hann er sagður hafa hrækt á fatnað lögreglumanns og var vistaður í fangaklefa vegna málsins.
Áfengi kom fleiri í klandur í gærkvöldi því starfsmenn óskuðu aðstoðar lögreglu við að vísa pari úr lauginni þar sem konan væri ölvuð. Parið neitaði að yfirgefa laugina og að sögn lögreglu voru konan og karlinn æst út í einn starfsmann laugarinnar.
Konan er sögð hafa hótað starfsmanninum líkamsmeiðingum að viðstaddri lögreglu þegar parið var á leiðinni í burtu frá sundlauginni. Konan var að lokum handtekinn þegar hún neitaði að róa sig niður og fara í burtu að beiðni lögreglu. Hún var flutt á lögreglustöð en látin laus að skýrslutöku lokinni.
