Undirbúningur fyrir Þjóðhátíð í Eyjum hefur gengið vonum framar, að sögn Ellerts Schevings, framkvæmdastjóra ÍBV. „Því ber að þakka sjálfsboðaliðum félagsins, þeir hafa unnið þrekvirki í Herjólfsdal eins og öll önnur ár,“ segir Ellert í spjalli við DV.

Veðurspáin fyrir helgina gæti verið betri, eins og fram hefur komið, en djúp lægð fer yfir landið á morgun, fimmtudag. Dregið hefur þó út vindi í veðurspám en mesti vindurinn verður á laugardag. Jafnframt er spáð nokkurri rigningu. Aðspurður hvort hann hafi áhyggjur af veðrinu segir Ellert:

„Nei, ekki teljandi. Hér er auðvitað alltaf allra veðra von en það verður gott partý svo við erum ekki að pæla allt of mikið í því. Við erum vel undirbúin undir hvað sem er. Þannig að veðrið kemur bara ef það kemur. Mér sýnist nú spáin bara vera að skána. Við erum með marga menn með sérþekkingu, skipstjóra og þess háttar, sem segja okkur að veðrið verður bara mjög skaplegt.“

Þjóðhátíð verður sett á morgun, föstudag, kl. 14:30, en gestir byrja að streyma til Eyja í dag. Dagskrána má sjá hér. Utan eiginlegrar dagskrár er síðan leikur ÍBV gegn KR á Hásteinsvelli á laugardag kl. 14 í Bestu deildinni. Ellert hvetur alla til að mæta á þann leik og lofar því að fleiri verði á honum en á leik KR gegn Breiðablik um síðustu helgi, þegar yfir 3.000 mættu á vígsleik nýs gervigrasvallar í Vesturbænum. „Það er mikil spenna fyrir því,“ segir Ellert.

Eins og sjá má á dagskránni treður fjöldi landsþekktra tónlistarmanna upp í Eyjum um helgina en Brekkusöngnum sem hefst kl. 23 á sunnudagskvöld stýrir Magnús Kjartan.