Fleiri eru jákvæðir gagnvart Borgarlínunni en neikvæðir samkvæmt nýrri könnum Prósents en þar sést að stuðningur við Borgarlínuna hefur aukist og að það er helst unga fólkið sem sér fyrir sér að nota hana.

Alls sögðust 42 prósent vera með jákvætt viðhorf gagnvart Borgarlínu. 23 prósent voru hvorki né og 35 prósent voru neikvæð. Síðast kannaði Prósent viðhorf gagnvart Borgarlínu í september árið 2023 en þá voru 39 prósent jákvæð og 40 prósent neikvæð.

Mestur er stuðningurinn meðal svarenda á aldrinum 18-24 ára en þar eru 61 prósent jákvæð en aðeins 16 prósent neikvæð. Minnstur er stuðningur meðal svarenda á aldrinum 55-64 ára en þar eru 53 prósent á móti en aðeins 27 prósent með.

Eðlilega er stuðningurinn meiri á höfuðborgarsvæðinu en á landsbyggðinni, 46 prósent eru jákvæð á höfuðborgarsvæðinu en 34 prósent á landsbyggðinni. Hlutfall neikvæðra er þó svipað.

38 prósent aðspurðra sögðu líklegt að þau muni nota Borgarlínuna þegar hún verður tilbúin en 50 prósent telja það ólíklegt. Unga fólkið sagðist líklegast til að nota Borgarlínuna, eða 68 prósent, og helmingur svarenda í Reykjavík sagðist líklegri til að nýta ferðamátann.