Móðir í Kópavogi, Dagmar Rós Öfjörð Arnarsdóttir, greindi á Facebook frá skelfilegri upplifun 11 ára gamallar dóttur hennar í strætisvagni í gærkvöld. Atvikið átti sér stað upp úr kl. 22 á leið 2 frá Salaskóla til Hörðuvallaskóla. Maður með appelsínugula húfu og klæddur í gallajakka ávarpaði stúlkuna og „sagði að hún væri sæt með fallegt hár og vildi fara í sturtu með henni og var ógnandi og óþægilegur! Stelpan skíthrædd og hágrátandi.“

Dagmar hefur grennslast fyrir um manninn og komist að því hver hann er. Um er að ræða 41 árs gamlan Íslending sem býr í Kópavogi. Hún hefur fengið upplýsingar um að umræddur maður sé að gefa sig á tal við börn í strætisvögnum og gefa sig sérstaklega að ungum stúlkum með óviðeigandi hætti. Ekki er vitað til þess að maðurinn hafi verið dæmdur fyrir afbrot.

„Hann virðist ekki vera heill,“ segir Dagmar í samtali við DV. Hún hefur nú tilkynnt atvikið til lögreglu, Strætó bs og til barnaverndar. Hún gaf jafnframt lögreglu og barnavernd upp nafn mannsins.