Hælisleitandi hefur verið úrskurðaður í gæsluvarðhald til 4. júlí, en hann hefur frá árinu 2022 verið eftirlýstur og reynt að komast hjá því að vera brottvísað til Grikklands þar sem hann hefur þegar hlotið alþjóðlega vernd.
Hælisleitandinn sótti um alþjóðlega vernd hér á landi þann 2. mars árið 2022. Útlendingastofnun hafnaði umsókninni þar sem viðkomandi hafði þegar hlotið alþjóðlega vernd í Grikklandi. Kærunefnd útlendingamála staðfesti ákvörðunina þann 15. ágúst 2022 og fljótlega eftir það sendi Útlendingastofnun heimferðar- og fylgdardeild ríkislögreglustjóra beiðni um að framkvæma brottvísun. Lögregla hitti hælisleitandann á dvalarstað hans þann 14. september 2022 og var honum tilkynnt um fyrirhugaða brottvísun til Grikklands á næstu tveimur vikum. Þegar brottvísun átti að fara fram hafði hælisleitandinn yfirgefið dvalarstað sinn og lét ekki ná í sig. Hann var í kjölfarið eftirlýstur af lögreglu.
Það var svo ekki fyrr en nú í sumar, þann 11. júní, sem hælisleitandinn var handtekinn vegna eftirlýsingar lögreglu. Honum bar í kjölfarið að tilkynna sig til lögreglu alla virka daga í 28 daga og sinnti því. Hann var svo aftur handtekinn þann 25. júní vegna fyrirhugaðrar fylgdar til Grikklands þann 25. júní. Þá tókst að koma hælisleitandanum frá Íslandi en fluginu var millilent og þá kom til vandræða.
Hælisleitandinn neitaði svo að fara um borð í næsta flug og kvaðst meðal annars vera of veikur. Hann gerði lögreglu ómögulegt annað en að bíða með fylgdina. Lögregla reyndi aftur degi síðar en aftur kom hann sér hjá því að fra um borð í vélina með því að láta sig falla niður stiga á flugvellinum. Var þá ákveðið að snúa aftur með hælisleitandann til Íslands og við komuna aftur var hann handtekinn og færður í fangaklefa.
Héraðsdómur úrskurðaði hælisleitandann svo í gæsluvarðhald til 4. júlí og hefur Landréttur staðfest ákvörðunina. Ekki kemur fram í úrskurði hvers lenskur hælisleitandinn er.
