Steingrímur Sævarr Ólafsson, fjölmiðlaráðgjafi og almannatengill, fagnar í dag 36 ára afmæli útvarpsstöðvarinnar FM957. Segist hann hafa verið annar starfsmaður stöðvarinnar og átt hugmyndina að nafninu. Útvarpsstöðin eigi alltaf pláss í hjarta hans.

„Það vita það líklega fáir að upphaflega átti stöðina að heita Ný-Bylgjan en það fannst mér vont nafn. Ég andmælti því nafngiftinni og sagði flest öll önnur nöfn í heiminum betri. Stofnendur stöðvarinnar, sem voru þrír talsins, skoruðu því á mig að finna betra nafn á innan sólarhring, ellegar sætta mig við orðinn hlut.“

Steingrímur segist hafa lagt hausinn í bleyti og stungið svo upp á því að láta stöðina einfaldlega heita það sama og útsendingartíðnin.

„Vera ekkert að elta Rás 2, Bylgjuna og Stjörnuna, fara aðra leið og nefna hana bara eftir framburðinum á tíðninni: Effemmníufimmsjö. Það varð úr og 13. júní 1989 fór stöðin í loftið í kjallaranum á húsnæði Fjölbrautarskólans við Ármúla.

Sjálfur var ég tvisvar á dag i loftinu. Fyrst frá 10:00 – 13:00 og svo frá 17:00 – 19:00. Tvennt var alltaf á dagskrá; 1. Spila Hold on, I´m Coming með Sam og Dave á slaginu kl. 12:00 og hins vegar að segja frá skrýtlunum um Ferdinand sem birtust í blöðunum en þær eru orðalausar myndaskrýtlur sem eru þær verstu í heiminum og enn verri ef reynt er að útskýra þær í útvarpi. Algjörlega gersneyddar öllum húmor – og það er húmor.“

Steingrímur segist hafa átt það til á FM957 tímanum að endurnefna menn. Auðun Georg Ólafsson, sem í dag starfar sem fréttamaður á Sýn, hafi til dæmis aldrei verið kallaður neitt nema Auðun eða Aui

„þangað til hann lenti í mér. Ég kallaði hann eftir það alltaf Nunni. Sigvaldi Kaldalóns fékk nafnið Svali á fjölmennum starfsmannafundi og fleiri fengu nöfn sem ýmist festust við þá eða ekki.

Sum nöfnin eru gleymd og grafin en eitt þeirra lifir þó enn og fagnar 36 ára afmæli á morgun; FM957. Á hádegi á morgun er ég að hugsa um, í tilefni dagsins, að reyna að finna gamla Ferdinand skrýtlu og spila Sam og Dave…“