Í fréttum hefur verið greint frá því að ný verslun Nettó hefur opnað í Glæsibæ, í nýuppgerðu og töluvert stærra rými en Iceland-verslunin sem var þar fyrir. Bras var á opnun verslunarinnar þar sem ákveðið var að fella niður léttan vegg til að tengja saman tvö rými. Það varð til þess að kerfi borgarinnar fór alveg í baklás, og þurfti að sækja um nýtt starfsleyfi reglum og lögum samkvæmt og á meðan var ekki hægt að opna.
Nú er verslunin opnuð, en þá tók ekki betra við þar sem bíræfinn þjófur herjar nú á verslunina. Þessi krúttlegi þjófur sækir þó aðeins í eina vöru og virðist ná að mjaka sér fimlega inn og út úr versluninni……í þessu myndskeiði tapaði hann þó feng sínum.
„EFTIRLÝSTUR!
Þekkir þú þjófinn? Við leitum að bíræfnum harðfisksþjófi sem hefur vanið komur sínar í nýopnaða Nettó Glæsibæ utan opnunartíma og gert ítrekaðar tilraunir til að ræna dýrustu kílóvörunni okkar. Endilega látið vita ef þið kannist við þennan. Vegleg fundarlaun í boði*!
*Fundarlaun fyrir þjófinn sko…“
View this post on Instagram
Netverjar voru ekki lengi að bera kennsl á kappann. Kisinn heitir Guðmundur Pedro og ber viðurnefnið Glæsibæjarkóngurinn. Hann venur meðal annars komur sínar í Nexus. Guðmundur Pedro á eigin Facebook-síðu þar sem fylgjast má með ævintýrum hans.
