Það getur komið fyrir að það sé ódýrara að fara lengri leið þó að hitt sé algengara. Sjaldgæft er hins vegar að það sé ódýrara að fara í gegnum annað land en beina leið innanlands.
Þessu lenti breskur maður að nafni Muscab Salad í þegar hann var á leið heim til London frá Manchester. Reyndist það vera ódýrara að taka flug til Íslands og þaðan til London en að kaupa einn lestarmiða.
Greint er frá málinu í vefmiðlinum Ladbible en Muscab hafði sagt frá þessu á samfélagsmiðlasíðu sinni.
Muscab er búsettur í London og fór í ferðalag til Manchester. Þegar hann ætlaði að panta sér lestarmiða heim brá honum heldur betur í brún. Miðinn kostaði lítil 130 pund, eða um 22.500 krónur. Fannst honum þetta fáránlegt og fór að leita að öðrum leiðum heim.
Fann hann flug frá Manchester til Íslands og þaðan til London á innan við helming þessa verðs. Það er flug með flugfélaginu Jet2 kostaði aðeins 21 pund til Keflavíkur og 36 pund þaðan til London með Play. Það gera samanlagt 57 pund, eða rúmlga 9.900 krónur.
„Ég mæli hiklaust með því að fólk taki svona dagsferðir. Til fjandans með lestirnar!“ sagði Muscab í myndbandi sem hann birti. Þurfti hann að dvelja í alls 18 klukkutíma á Íslandi á milli flugferðanna. En hann hafði tíma til þess. „Mig langaði til þess að fara einhvern tímann til Íslands þannig að ég hugsaði með mér að ég gæti alveg eins gert það í bakaleiðinni,“ sagði hann.
Muscab sat ekki bara og beið á flugvellinum í Keflavík. Hann skrapp inn í Reykjavík og naut ferðarinnar. Að hans sögn var þetta mjög góður dagur.
„Ég fór í náttúrulaug og prófaði þjóðarréttinn sem er kæstur hákarl. Hann var betri á bragðið en ég bjóst við,“ sagði Muscab.
Færsla Muscab hefur fengið mikla athygli í Bretlandi og hefur hún opnað á umræðuna um hversu dýrar lestarsamgöngur þar í landi geta verið.
„Jafn vel þó þú bókir með góðum fyrirvara er það samt dýrt. Það er enn þá ódýrara að fljúga,“ sagði Muscab og benti á að breska lestarkerfið væri það dýrasta í Evrópu. „Það er ódýrara að hittast á Spáni en að hittast í Manchester, hversu fáránlegt er það?“
Þá sagðist hann klárlega ætla að endurtaka leikinn frekar en að taka lest heim.
„Að koma til annars lands er ekki slæmt, það er bónus. Ég er ánægður með að hafa fengið tækifærið til að koma til Íslands. Ég mæli með að fólk ferðist, það er mun ódýrara en fólk heldur.“
