Penninn Eymundsson opnar nýja og stærri verslun í glænýjum verslunarkjarna við Larsenstræti á Selfossi. Auk verslunar Pennans Eymundsson verða tískuvöruverslunin Gina Tricot og barnafataverslunin Emil og Lína opnaðar í verslunarkjarnanum. Í sumar er svo gert ráð fyrir að H-verslun opni í sama verslunarkjarna, eins og segir í fréttatilkynningu.
Verslanirnar hafa hver sína sérstöðu og auka þannig við lifandi og fjölbreytt verslunarumhverfi í hjarta aðalverslunarhverfis Selfoss við Larsenstræti. Þar eru fyrir verslanir eins og Bónus, ÁTVR, Lindex ásamt Húsasmiðjunni og Byko.
Verslanirnar bjóða því til veglegrar opnunarhátíðar við verslunarkjarnann laugardaginn 31. maí og hefst hún kl. 11.45 á því að nafn verslunarkjarnans verður tilkynnt.
Dagskráin á laugardag er eftirfarandi:
11:45 Tilkynnt nafn á húsinu það er Larsenstræti 2
11:50 DJ
12:00 Verslanir opna
13:30 Skítamórall spilar sín þekktustu lög
14:30 Cirkus Íslands
Öllum gestkomandi verður boðið upp á kaffi í boði Sjöstrand
Penninn Eymundsson er leiðandi íslensk bókabúðakeðja sem býður fjölbreytt úrval af bókum, ritföngum, rekstrarvörum og gjafavörum fyrir alla aldurshópa.
„Okkur hefur lengi langað til að gera vöruúrval okkar aðgengilegra á Selfossi en samfélagið þar fer sívaxandi. Við opnuðum litla búð í nýja miðbænum árið 2023 og reiknuðum með að fá stærra pláss þar til framtíðar,“ segir Ingimar Jónsson, forstjóri Pennans Eymundsson. Hann segir að það hafi hins vegar dregist.
„Þannig að þegar okkur bauðst að fá 350 fermetra pláss í nýju húsi við Larsenstræti ákváðum við að stökkva á það og loka litlu búðinni. Auk þess að bjóða upp á fjölbreytt úrval bóka, ritfanga og gjafavara verður mikið úrval af barnabókum, leikföngum, litabókum og vörum fyrir börn enda engin þannig verslun á Selfoss,“ segir Ingimar.
