Þetta heyrist á hljóðupptöku, sem var lekið frá rússneska hernum, sem CNN hefur í fórum sínum.
Þessi upptaka er meðal sönnunargagna í rannsókn, sem úkraínskir embættismenn segja að sanni að rússneskir herforingjar og embættismenn gefi hermönnum fyrirmæli um að taka úkraínska hermenn, sem gefast upp, af lífi. Það er brot á alþjóðalögum.
Upptökur frá dróna sýna sex úkraínska hermenn, sem liggja allir á maganum með hendur á höfði sér. Þeir liggja þétt saman á meðan hvítur reykur stígur til himins í kringum þá. Örlög þeirra eru í höndum tveggja rússneskra hermanna sem fá fyrirmæli frá yfirmanni sínum í gegnum talstöð.
„Þú gerir það. Takið foringjann til fanga, til fjandans með hina. Svona á þetta að vera. Takið þann elsta og til fjandans með hina!“
Síðan sjást rússnesku hermennirnir færa einn úkraínsku hermannanna á brott. Því næst eru hinir fimm skotnir til bana af stuttu færi.
Úkraínskur leyniþjónustumaður lét CNN þessa upptöku í té. CNN hefur ekki getað sannreynt að drónaupptaka og hljóðupptakan tengist beint en sérfræðingar segja að upptökurnar passi saman og ekki sé að sjá að átt hafi verið við þær.
CNN segir að rússneskir hermenn hafi staðið á bak við 20 svipuð morð síðan um áramót.
