Manstu ekkert eftir þér sem smábarn? Sama hvað þú reynir? Það er ekki skrýtið þar sem fólk hefur ekki aðgang að þessum minningum. Þetta sýnir ný rannsókn.
Í nýrri bandarískri og kanadískri rannsókn sem birt var í tímaritinu Science kemur fram að minningar í barnæsku lokast af á fullorðinsárum.
Rannsökuð voru 26 smábörn. Helmingurinn á aldrinum 4 mánaða til 1 árs gömul og helmingurinn 1 til 2 ára gömul.
Börnin voru sett í sneiðmyndavél og þeim sýndar ljósmyndir, hverja mynd í tvær sekúndur. Ætlunin var að skrásetja þessar myndir í þeim hluta heilans er kallast dreki (hippocampus), þar sem eru geymdar tilfinningar og minningar.
„Drekinn er djúpt í heilanum og ekki sýnilegur með stöðluðum aðferðum þannig að við þurftum að hanna nýja aðferði til þess að gera þessar minnistilraunir, innan í sneiðmyndatæki,“ sagði Nick Turk-Browne, prófessor í sálfræði við Yale háskóla, sem leiddi rannsóknina við sjónvarpsstöðina CNN. „Svona rannsóknir hafa að mestu aðeins verið gerðar á sofandi börnum, af því að þau hreyfa sig mikið, geta ekki fylgt leiðbeiningum og hafa stutta athygli.“
Börnin fengu að sjá tvær myndir í einu, hlið við hlið. Annars vegar af einhverju sem þau höfðu séð áður og hins vegar einhverju alveg nýju. Fylgst var með hvora myndina börnin horfðu lengur á. Ef börnin horfðu lengur á það sem þau þekktu þá var minni þeirra þroskað en ef þau horfðu á myndirnar til jafns var minnið óþroskað.
Niðurstöður rannsóknarinnar voru þær að eldri börnin voru með þroskaðri dreka og betri í að binda minningar. Aðeins eldri börn sýndu fram á virkni í tóttarennisberkinum (orbitofrontal cortex), sem er mikilvægur hluti heilans upp á minni og úrvinnslu minninga.
„Ungbarnaheilinn er að ganga í gegnum miklar breytingar á þessum tíma,“ sagð Turke-Browne og nefndi til dæmis breytingar hvað varðar tungumál og hreyfingar. „Við sjáum líka mikinn vöxt í drekanum.“
En af hverju getum við ekki fengið aðgang að þessum minningum? Turk-Browne telur að drekinn sé ekki að fá réttu „leitarorðin“ ef svo má segja til að tengja við þessa reynslu ungbarnanna. Þess vegna sé ekki hægt að finna þessar minningar.
