„Við höf­um komið því skýrt á fram­færi þar að ein­hvers kon­ar hringl með það að setja fyrst komu­gjöld og svo ein­hvers­kon­ar aðra gjald­töku er al­gjör­lega fá­rán­leg hug­mynd. Maður hringl­ar ekki á þann hátt með grund­vall­ar­at­vinnu­grein­ar þjóðar­inn­ar.“

Þetta seg­ir Jó­hann­es Þór Skúlason, framkvæmdastjóri Samtaka ferðaþjónustunnar, í viðtali við Morgunblaðið í dag.

Í stjórnarsáttmála ríkisstjórnarinnar sem kynntur var í desember er kveðið á um að komugjöld verði innheimt af ferðamönnum á meðan unnið er að útfærslu auðlindagjalds. Í 11. grein sáttmálans segir meðal annars:

„Vinsælustu ferðamannastaðir landsins eru í eigu þjóðarinnar og ríkisstjórnin hyggst taka upp auðlindagjald fyrir aðgang ferðamanna að náttúruperlum Íslands. Á meðan unnið er að útfærslu verða innheimt komugjöld.“

Jóhannes Þór segir í samtali við Morgunblaðið að grundvallarskilyrði sé að ferðaþjónustan fái að minnsta kosti tólf mánaða fyrirvara áður en gjaldtaka tekur gildi. Bendir hann á að það skipti máli að svona gjaldtaka nái markmiðum sínum og verði ekki til þess að eyðileggja bæði rekstur fyrirtækja og samkeppnishæfni allrar greinarinnar sem aftur hefði áhrif á skatttekjur ríkisins.

Nánar er rætt við Jóhannes í Morgunblaðinu í dag.