Héraðssaksóknari hefur ákært mann fyrir nauðgun og kynferðisbrot gegn barni. Varðar málið tvö atvik með nokkurra ára millibili. Meint brot mannsins beindust gegn stúlku sem er barnabarn hans.
Ákæruliðir eru tveir og í þeim fyrri er maðurinn sakaður um brot gegn stúlkunni á árinu 2015. Hann hafi þá farið inn í svefnherbergi hennar, stungið fingri í leggöng hennar og getnaðarlimi sínum í endaþarm hennar.
Síðari ákæruliður varðar atvik á aðfaranótt 31. desember árið 2019. Átti atvikið sér stað á heimili stúlkunnar. Afinn er þá sagður hafa þuklað á líkama stúlkunnar, brjóstum hennar og kynfærum innanklæða, lagst ofan á stúlkuna og sett getnaðarlim sinn í leggöng hennar á meðan hann hélt höndum hennar föstum þannig að hún komst ekki undan.
Aldur stúlkunnar á tíma meintra brota er afmáður úr ákæru héraðssaksóknara en ljóst er að hún var undir lögaldri er bæði meint brot voru framin. Maðurinn er sagður hafa nýtt sér yfirburði sína gegn stúlkunni og traust hennar og trúnað til hans sem afa hennar.
Málið var þingfest fyrir Héraðsdómi Reykjaness þann 3. febrúar síðastliðinn.
