Staðarhaldari í náttúru- og menningarsetrinu Skálanesi vill að sveitarfélagið Múlaþing lögsæki ríkið til að láta reyna á lagalega stöðu atvinnuhúsnæðis á flóðasvæðum. Eigendur þeirra þurfa að borga en fá engar varnir. Múlaþing skoðar möguleikann á að beita sér fyrir uppkaupum á atvinnuhúsnæði á hættusvæðum á Seyðisfirði.

Málið var rætt á fundi byggðarráðs Múlaþings í gær, þriðjudag, það er eftir að erindi barst frá Ólafi Erni Péturssyni, staðarhaldara í Skálanesi, nálægt Seyðisfirði. Í bréfinu hvatti hann sveitarfélagið til að láta reyna á lagalega stöðu atvinnuhúsnæðis á hættusvæðum ofanflóða. Það varði grundvallarhagsmuni sveitarfélagsins og íbúa þess.

„Atvinnuhúsnæði á þessum svæðum ber í dag skyldu til að greiða í Ofanflóðasjóð, sjóð sem beitir fjármunum eingöngu í varnir fyrir íbúðarhúsnæði. Það er líklega ósamrýmanlegt lögum að atvinnuhúsnæði taki þátt í fjármögnun kerfis en hlýtur engar varnir,“ segir í bréfi Ólafs.

Helmingur alls atvinnuhúsnæðis sem fellur undir þessa skilgreiningu á landinu er á Seyðisfirði. Þetta hamli verðmætasköpun og brýtur niður byggðina.

Á fundinum ákvað byggðarráð að fela sveitarstjóra að fá minnisblað frá lögfræðingi um möguleika sveitarfélagsins til að beita sér fyrir uppkaupum á atvinnuhúsnæði á hættusvæðum. „Enda er málið afar mikilvægt fyrir framtíðar uppbyggingu atvinnulífs á Seyðisfirði,“ segir í bókun.