Pétur Magnússon hefur sagt starfi sínu lausu sem forstjóri Reykjalundar og hefur gert samkomulag við stjórn stofnunarinnar um starfslok sín.

Þetta kemur fram í fréttatilkynningu frá stofnuninni.

Þar til nýr forstjóri hefur verið ráðinn mun Svana Helen Björnsdóttir, stjórnarformaður Reykjalundar, gegna starfi forstjórastarfinu. Svana er með doktorsgráðu í kerfisverkfræði frá Háskólanum í Reykjavík auk þess sem hún starfar sem aðjúnkt við skólann. Hún er bæjarfultrúi á Seltjarnarnesi, situr í stjórn SORPU bs. og er varaformaður SL lífeyrissjóðs.

Pétur mun jafnframt vera stjórnendum Reykjalundar til aðstoðar næstu mánuði. Starf forstjóra verður auglýst fljótlega.

Svana Helen Björnsdóttir segir þetta um tímamótin:

„Við þökkum Pétri fyrir framlag sitt til Reykjalundar undanfarin fimm ár. Mikilvægi sérhæfðrar endurhæfingar líkt þeirri sem boðið er upp á hjá Reykjalundi hefur aldrei verið brýnna. Endurhæfing er ein hagkvæmasta heilbrigðisþjónusta sem völ er á en með henni öðlast fólk tækifæri til að taka aftur fullan þátt í samfélaginu.“

Pétur Magnússon segir starfslokin vera stór tímamót í lífi sínu en þau hafi orðið að hans ósk:

„Í dag eru stór tímamót í mínu lífi þegar ég læt af störfum sem forstjóri Reykjalundar. Starfslokin eru að minni eigin ósk og hafa ekkert með frábært samstarfsfólk eða daglega starfsemi Reykjalundar sérstaklega að gera. Á næstunni verð ég 55 ára gamall og hef þá verið í forstjórastóli heilbrigðisstofnana í næstum 20 ár, fyrst rúm 12 ár á Hrafnistuheimilinum og nú tæp 6 ár á Reykjalundi. Hér á Reykjalundi hafa það verið forréttindi og mikill heiður að vinna með því frábæra fólki sem hér starfar, sannkallað landslið í endurhæfingu eins og við segjum oft og starfsfólk stoðdeilda starfseminnar ekki síðra.“

Um þessar mundir fagnar Reykjalundur 80 ára afmæli sínu. Um 50 þúsund Íslendingar hafa notið góðs af endurhæfingu á Reykjalundi.