Rekstrarfélög veitingastaðanna Grillhúsið og Sport & Grill í Smáralind hafa verið úrskurðuð gjaldþrota. Þetta kemur fram í auglýsingu í Lögbirtingablaðinu í dag. Um er að ræða félögin Búsendi ehf. (áður Grillhúsið ehf.) og OL Restaurant & Sportbar ehf. en gjaldþrotaúrskurðurinn var kveðinn upp í Héraðsdómi Reykjaness þann 13. nóvember síðastliðinn.
Búsendi ehf. er í eigu athafnamannanna Jóhannes Birgis Skúlasonar og Helga Magnúsar Hermannssonar og sama gildir um OL Restaurant & Sportbar ehf. sem Jóhannes og Helgi keyptu af veitingamanninum Elís Árnasyni og viðskiptafélögum hans seinnipart síðasta árs.
Hrina gjaldþrota tengist þeim Jóhannesi Birgi og Helga Magnúsi en fyrr á árinu varð félag þeirra Tankurinn ehf., rekstrarfélag TGI Fridays, lýst gjaldþrota. Alls var 227 milljónum króna lýst í búið en engar eignir var þar að finna.
Þá var hið rótgrónna veisluþjónustufyrirtæki, Veislan, úrskurðuð gjaldþrota þann 14. maí síðastliðinn en Helgi Magnús var 100% eigandi þess fyrirtækis.
Það vakti talsverða athygli á dögunum þegar áðurnefndur veitingamaður, Elís Árnason, steig fram og fór ófögrum orðum um viðskiptahætti Jóhannesar og Helga Magnúsar.
Lýsti Elís því hvernig hann, ásamt viðskiptafélögum sínum, hefði í september 2024 gengið frá sölu á tveimur fyrirtækjum til Jóhannesar og Helga. Annars vegar OL Restaurant & Sportbar ehf og Adesso ehf, rekstarfélags samnefnds veitingastaðar í Smáralind.
Sakaði Elís viðskiptafélaganna tvo um lygar og svikagjörning og sagði meirihluta kaupverðsins ekki enn hafa borist. Þá hafi Jóhannes og Helgi tekið við tveimur stöndugum fyrirtækjum sem skilað hefðu hagnaði og tekist að knésetja þau á rúmu ári. Þá fullyrðir Elís að félögin hafi verið með allt í skilum.
„Þeir hafa sem sagt ekki greitt okkur nema lítinn hluta kaupverðsins og á þessum tímapunkti lítur út fyrir að við fáum restina aldrei greidda og eigendur sitji uppi með stórtjón. Vitaskuld munum við eltast við kröfur á hendur kaupendum, bæði félaginu og þeim persónulega en Helgi og Jóhannes gengust í fullar persónulegar efndir á samningunum,“ skrifaði Elís.
Café Adesso var innsiglað af skattayfirvöldum í október síðastliðinn og því má búast við að samnefnt félag verði úrskurðað gjaldþrota innan skamms. Elís og viðskiptafélagar hans eru enn skráðir eigendur fyrirtækisins enda hefur kaupverðið ekki enn verið að fullu greitt.
