Tónlistarmaðurinn Svavar Knútur segir brottrekstur Securitas starfsmanns eftir atvik í þinghúsinu lýsandi fyrir nýfrjálshyggju og stéttasnobb. Með útvistun verkefna sem öryggisgæslu sé ábyrgðin færð frá stofnuninni.

Á mánudag var greint frá því að karlmaður hafi verið handtekinn eftir að hafa dvalið í Alþingishúsinu yfir nótt í leyfisleysi. Maðurinn olli engu tjóni á munum eða innréttindum þinghússins en engu að síður hefur atvikið verið litið alvarlegum augum. Hefur meðal annars Þórunn Sveinbjarnardóttir, þingforseti, lýst áhyggjum sínum á því.

Gæslunni útvistað og þingvörðum fækkað

Í gær, þriðjudag, var svo greint frá því að öryggisvörður frá Securitas hafi verið rekinn og að verklagið verið yfirfarið. En manninum sem dvaldi í þinghúsinu hafði tekist að sannfæra öryggisvörðinn að hann ætti í erindi í húsinu eftir að hafa laumað sér inn um ólæstar dyr. Það var ekki fyrr en í vaktaskiptum sem brugðist var við og maðurinn handtekinn.

Í frétt RÚV kemur fram að öryggisgæslu í þinghúsinu hafi verið útvistað til Securitas fyrir ári síðan. Í stað tveggja þingvarða sé nú aðeins einn á vakt um nótt.

Ábyrgðin færð úr stofnuninni

„Sjaldan, ef aldrei, hef ég séð snilld nýfrjálshyggjunnar afhjúpaða eins snoturlega og akkúrat þarna,“ segir Svavar Knútur í færslu á samfélagsmiðlum. Það er varðandi útvistun öryggisgæslunnar og fækkun þingvarða.

„Einmitt. Ábyrgðin færð úr stofnuninni yfir á fyrirtæki sem snýst ekki um neitt annað en excelskjöl,“ segir Svavar. „Fækka þingvörðum, húsvörðum, skúringafólki sem nýtur þess að vera hluti af stofnun og finnur til ábyrgðar gagnvart henni og úthýsa „verkefnunum“ til andlitslausra verktaka svo það þurfi ekki lengur að kalla eitthvað óháskólamenntað lið “samstarfsfólk”. Þetta er svo dásamlega mikill kjarni stéttasnobbsins og skammsýninnar sem einkennir þessa glötuðu stefnu.“

Taka margir undir með Svavari Knúti. Meðal annars Bjarni Jónsson, fyrrverandi framkvæmdastjóri Siðmenntar, og fjölmiðlamaðurinn Egill Helgason.