Það má gera ráð fyrir fallegu vetrarveðri í dag og verður víðast hvar léttskýjað á landinu en heldur kalt í veðri. Segir Veðurstofa Íslands að gera megi ráð fyrir frosti á bilinu 3 til 15 stig.

„Á morgun er vetrarkyrrðin búin, því þá gera spár ráð fyrir að gangi í suðaustan hvassviðri með rigningu eða slyddu nærri sjávarmáli, en snjókomu á heiðum. Hiti 0 til 5 stig eftir hádegi,“ segir í hugleiðingum veðurfræðings á vef Veðurstofunnar en á norðaustanverðu landinu verður hægari vindur, þurrt fram á kvöld og hlýnar smám saman á þeim slóðum.

Annað kvöld verður mun hægari vindur og úrkomulítið á vestanverðu landinu annað kvöld, að sögn veðurfræðings.

„Seinnipartinn á föstudag er síðan útlit fyrir að gangi í sunnan storm með rigningu og hlýindum,“ segir í spá Veðurstofunnar en veðurhorfur næstu daga má sjá hér að neðan.

Veðurhorfur á landinu næstu daga

Á fimmtudag:
Gengur í suðaustan 15-23 m/s með rigningu eða slyddu nærri sjávarmáli, annars snjókomu. Hiti 0 til 5 stig seinnipartinn. Hægari vindur og þurrt á Norður- og Austurlandi þangað til síðdegis og hlýnar smám saman. Snýst í vestan 8-15 á vestanverðu landinu undir kvöld með éljum og kólnar.

Á föstudag:
Vaxandi sunnan- og suðaustanátt, 18-25 undir kvöld og rigning, en þurrt norðaustanlands. Hlýnandi veður.

Á laugardag:
Hvöss sunnanátt og rigning eða slydda með köflum, en bjartviðri norðaustanlands eftir hádegi. Hiti 2 til 10 stig, hlýjast á Austurlandi.

Á sunnudag:
Sunnan strekkingur og skúrir eða él, en þurrt á Norður- og Austurlandi. Hiti kringum frostmark. Hvessir líklega verulega seinnipartinn með talsverðri rigningu og hlýnar.

Á mánudag og þriðjudag:
Ákveðin suðvestanátt með éljum, en þurrt og bjart um landið norðaustanvert. Kólnandi veður.